گفتگو – 4 / مصاحبه اختصاصی کانون دمکراسی آذربایجان با جناب مهران بهاری به زودی منتشر خواهد شد.

این گفتگوی مفصل تصویر و تحلیلی تقریبا کامل از آنچه در جامعه و فضای سیاسی آذربایجان و ترکان ساکن در ایران میگذرد ارائه می دهد منتظر باشید.

حورمتلی یولداشلار

دوردونجو دانیشیق نئچه گونه قوللوغونوزدا اولاجاق ، اوخاماسی هامیمیزا لازم اولان بو اوزون و دولغون مصاحبه و کئچمیشده یایدیغیمیز دانیشیقلار،  بللی زحمت و چالیشما ایله یاییلیر ، بیزیم و سایین مصاحبه وئرن دوشونجه صاحیبلریمیزین یورغونلوغونو یوخ ائدن ،میللی حرکتین دیرچلمه سینده بالاجا آددیم گوتورمک افتخارینی قازانماق دیر ، آنجاق بو چالیشمالارین ائتگی سی و قازانجی عموم اوخوجو و باشقا دوشونورلریمیزین ده بحثلره قاتیلیب و سیاسی دوشونجه میزین اورتاق پلاتفورمونون حاضیرلانماسیندا اشتیراک ائتمه لریله سونوجلانا بیلر ، تاسفله تورک و آذربایجان وبلاگ لارینین بعضا باخانی چوخ اولسادا ، عموما نظر یازانلارین سایی ایکی الین بارماق سایی سینا چاتمیر ، بو بیزده هله دیالوگ ، دانیشما و آنلاشما کولتورونون یایقین اولماماسیندان خبر وئرمکده دیر باشقا طرفدن ایسه بیزیم میللی فعاللاریمیزین اوز-گوون سیزاولدوقلارینا بیرعلامت دیر ، اوز – گوونی اولمایان میللت و میللی فعاللار بویوک آددیملار آتماقدان هر زامان اوزاق دوروب و اولاسی سیاسی اویونلاردا زامانی ایتیره جه ییک.

بو مقدمه ایله هامینیزی گلیب وبلاگدا، نظر بولومونده اشتراک ائتمه یه چاغیریریق.

سایین علیرضا صرافی دن اونملی ایضاح :

سایین علیرضا صرافی کامنت لر بولومونده تاخما آد ایله یاییلمیش بیر نظرین یالنیش دوشونولمه مه سی اوچون قیسا یازی گوندریب و یاییلماسینی ایسته میشدیر.

بیز بحثه قاتیلانلاردان تشکر ائده ره ک شبهه یارانماسین دئیه سایین صرافی نین ایضاحی نی قوللوغونوزا سونوروق :

عزیز و دیرلی دوستلار!

«علیرضا دیلماجی» آدیله کیمسه نین سایین «مهران بهاری» حقینده غیردقیق، بعضا ده غرضلی سؤزلرینی (http://azdemokrasi.blogfa.com/ کامنتلرین بیرینده) اوخویونجا، بیر پارا دوستلارا بئله بیر شوبهه یارانمیشدیر کی بلکه ده بو آد (دیلماج درگیسینین مودوروعلیرضا صرافینین) تاخما آدیدیر. بو دوستلاریما بیلدیرمه لییم کی:

1) من بو گونه قدر هئچ واقت تاخما آد ایله یاییمی گیزلدرک کیمسه نی اوخلامامیشام و اساسا بو ایشی اخلاق قوراللارینا تام آیغیری بیلیریم. اونا گؤره ده کسینلیکله بونون دوغرو اولمادیغینی سؤیله مه لییم.

2) سایین مهران بهاری هم اؤز دولغون چالیشمالاری اعتیباری ایله، هم ده واحید بیر دوشونجه طرزینی ایرلی یئریتدیگینه گؤره بیزیم دیزی-قئییم شخصیتلریمیزدن ساییلماقدادیر. (باخمایاراق کی مجازی اولسون)

3)  او بوگونه قدر بیزیم غافیل اولدوغوموز ساوه، همدان، بیجار، خراسان و… تورکلرینین ادبیاتی ، فولکلورو و نهایت توپلومو حقینده دیرلی آراشدیرمالار آپاران نادیر، بعضا ده یگانه آراشدیرماچی ساییلیر. بیز بو کولگه ده قالمیش وارلیغیمیزی بیر داها بیزه قازاندیردیغی اوچون اونا مینتداریق.

4) اونون ایللر بویو سورکلی یازیلارینی نظردن کئچیرسک آرخاسیندا یئتگین، پیشکین بیر بوتون اولدوغونو گؤرمک چوخ دا چتین بیر ایش دئییلدیر. او معین بیر دوشونجه طرزینی دواملی ایرلی سورموش، گلیشدیرمیش و مودافیعه ائتمیشدیر. دئمک او اوزونو بیزه ظاهیرا تانیتدیرماسا دا ، بیر چوخ حقیقی آنجاق گونده بیر دون دییشن حقیقی شخصیتلردن داها تانیش و داها گوونجلیدیر.

عزیز دوستلار! منیم یازیلاریمی اوخویان یاخود دانیشیقلاریمی دینله ینلر، سیاسی فیکیرلریمین، سایین مهران بهاری ایله (و حتی بیر چوخلاری ایله ده) اوست اوسته دوشمه دیگینی یاخشی بیلیرلر، آنجاق دئمه لییم کی من بو فرقلی نظرلری اویرنینجه، قاییدیب بیر داها اوز فیکیرلریمی دقیقلشدیره بیلمیشم.

اینانیرام کی فیکیر مبادیله سی و دیالوگ قورماق دوشونجه لریمیزی گوجلندیرر و «تبادل افکاردن بارقه-ی حقیقت دوغار». بونا گؤره ده سیز عزیز دوستلاری سایین مهران بهاری نین مصاحیبه سینی صبیر و دقتله اوخوماسینا، و تنقیدی فیکیرلرینیز وارسا دا اونو ساغلام و منطیقلی ایرلی سورمه سینه چاغریرام.

سیزه باشاریلار دیلگی ایله
علیرضا صرافی