کانون دمکراسی آزربايجان

Azərbaycan Demokrasi Ocağı / Azarbaijanian Democracy Institute

سعید متین پور و » گوناسکام «ین باخیشی


بو گونه قدر گوناسکام اولاراق گونئی آذربایجان میللی حرکتینین تئوریک مسئله لرینی و گونوموزدکی اولایلارا قارشی توتومونو اله آلمایا چالیشدیق. بو هفتکی باخیشدا ایسه ایران حپیسخاناسیندا توتولان سعید متین پور اوچون یازماق ایسته دیک.

گونئی آذربایجان میللی حرکتی سورجینده اینسان حاقلارینین چوخ اؤنملی یئری وار. چونکو گونئی آذربایجان’دا آچیق شکیلده اینسان حاقلاری ایران طرفیندن احلال ائدیلمکته دیر. ایران رئژیمی آذربایجان حرکتینه قارشی توتوموندا هم اؤز یاسالارینا هم ده ایمضالادیغی اولوسلار آراسی اینسان حاقلاری آنلاشمالارینا اویماماقدادیر. اینسانلارین ایلکل حاقی اولان اؤز آنادیلینده تحصیل آلما اونلارا وئریلمه مکده دیر. بو حاقسسیزلیغی دیله گتیرن اینسانلار ایسه توتوقلاناراق ایشگنجه لره و اوزون مددتلی حپیسلره معروض قالیرلار. بونلارا باخمایاراق گونئی آذربایجان اینسان حاقلاری مدافعه چیلری اؤز ایستکلرین هر فورصتده دیله گتیرمکدن قاچینمیرلار. سعید متین پور دا بونلاردان بیریسی ایدی. او اؤز آنادیلینین یوخ اولماماسی اوچون و اوشاقلاریمیزین اؤز دیللرینده و کولتورلرینده بؤیومه لری اوچون فعالیت گؤسترن بیر قزئته جی و اینسان حاقلاری مدافعه چیسی ایدی. 2 ایل بوندان اؤنجه دونیا آنادیلی گونو موناسیبتی ایله زنگان شهرینده یولداشلاری ایله بیرلیکده مدنی آکسیا کئچیردیکلری اوچون پولیس طرفیندن خیاواندا دؤیوله رک توتوقلانمیشدی.

گونئی آذربایجان میللی حرکتی ایچریسینده دییشیک موجادیله طرزلری واردیر. سعید هر زامان مدنی، دئموکراتیک و ایلیملی حرکت طرزینی مدافعه ائدن اینسان اولموشدور. آما ایران حاکیمیتی سعید’ه 8 ایل زیندان وئره رک ایران ایچریسینده حرکت طرزینین اؤنملی اولمادیغینی و فعالیت ائدن هر کسه جزا وئره بیله جه یینی گؤسترمیشدیر. البته کی سعید’ی حرکت طرزی و قزئته جیلیگی اوچون جزا وئرمک مومکون دئییلدی. اونون اوچون اونا ان یایقین سوچ اولان جاسوسلوق اتهامی ووروب اونو محکوم ائتدیلر. 2 ایل بوندان اؤنجه سعید بیر نئچه یولداشی ایله بیرلیکده جاسوسلوق اتهامی ایله توتوقلاناراق 7 آیا یاخین هوجرهده( اینفیرادی سلول) قالمیشدیر. او گونلرده بیر چوخ فیزیکی و روحی ایشگنجه لره معروض قالان سعید، کئچیجی اولاراق آزاد قالدیغی زامان روماتیزما خسته لیگینه یاخالانمیش و خسته خانادا یاتمیشدیر. ایندی ایسه ایران حاکیمیتی خسته بیر اینسانی یئنه 8 ایل حپسینی کئچیرمک اوچون توتوقلامیشدیر.

سعید متین پور، گونئی آذربایجان میللی حرکتی ایچریسینده بو حاقسیزلیغا معروض قالانلاردان بیریسیدیر. اونلارجا گونئی آذربایجان مدنی فعالی بو گونلری یاشاماقدادیرلار. بورادا خاریجده فعالیت گؤسترن آذربایجان فعاللارینا دا ایش دوشمکده دیر. و بیز اؤزوموزو ده تنقید ائتملییک. خاریجده اؤز آرامیزدا او قدر تشکیلات بازچیلیق مسئله سی قاباریب کی ایچریدکی چتین گونلر چکن اینسانلاریمیزا هئچ بیر ایش گؤره بیلمیریک. سعید 8 ایل حپسه محکوم ادیلیر. آما دونیاداکی آذربایجانلیلار طرفیندن هچ بیر تپکی ( عکس العمل)، گلمه دی.

گوناسکام اولاراق، اؤنجه لیکله سعید متین پور’ون تئزلیکله آزاد ائدیلمه سینی طلب ائده رک، بیر طرفدن ده دونیاداکی آذربایجانلیلارا سسلنه رک اونلاری بو اولای قارشیسیندا جدی آدیم آتمایا چاغیریریق.

آرتیرما : آذربایجان دموکراسی اوجاغی اونجه بیلدیردیگی کیمی بوتون سیاسال و وجدان توتوقلولارینین آزادلیغینی دموکراتیک اورتامین اون شرطی اولاراق تانیماقدادیر بو آرادا میللی مجادله میزده اوز دمکراتیک و انسانجیل داورانیش لار و دوشونجه لری ایله تانینان سایین سعید متین پورون جزالاندیرماسینی آذربایجانین گنج نسلینین جزالاندیریلماسی آدلاندیرماق اولار.

بیر داها بوتون سیاسی محبوسلارینین آزادلیغینا تاکید ائده رک میللی حرکتیمیزین مدرن دیرلر ایله بیرلشمه گره یینی خاطیرلادیریق سعید متین پور بو گره یی دوشونن انسانلاریمیزین سیمگه سیدیر.

6 مارس 2010 - Posted by | باخیش - دیدگاه, تورکجه - Turkce

هنوز دیدگاهی داده نشده است.

پاسخی بگذارید

در پایین مشخصات خود را پر کنید یا برای ورود روی شمایل‌ها کلیک نمایید:

نشان‌وارهٔ وردپرس.کام

شما در حال بیان دیدگاه با حساب کاربری WordPress.com خود هستید. بیرون رفتن / تغییر دادن )

تصویر توییتر

شما در حال بیان دیدگاه با حساب کاربری Twitter خود هستید. بیرون رفتن / تغییر دادن )

عکس فیسبوک

شما در حال بیان دیدگاه با حساب کاربری Facebook خود هستید. بیرون رفتن / تغییر دادن )

عکس گوگل+

شما در حال بیان دیدگاه با حساب کاربری Google+ خود هستید. بیرون رفتن / تغییر دادن )

درحال اتصال به %s