کانون دمکراسی آزربايجان

Azərbaycan Demokrasi Ocağı / Azarbaijanian Democracy Institute

Whopopular سیته سین اؤتری اینجه لمه و بیر اؤنری


اومود ایلقارلی

گونئی آزربایجان میللی حرکتی میللی قازانجلاریمیز اوغروندا چئشیتلی آلانلاردا چالیشماقدادیر. میللتیمیزی میللی حاقلاری­ایله تانیش ائتمک ، اؤلکه،بؤلگه و بوتون دونیا کامواویونو(افکار عمومی) میللتیمیزه یؤنه­لیک اویقولانان آیری­سئچکیلیک و ظولم­ایله تانیش ائتمک بو چالیشما آلانلاریندان بیری کیمی ساییلماقدادیر. میللت-دؤولت اولوشتورما اوغروندا سیاسی و حقوقی آددیملاردان ساییلان ، سیاسی-میللی ایستکلی حرکتیمیزی تانیتماق دا بو  چالیشمانین یانی سیرا سورمکد­ه­دیر. گونئی آزربایجان میللی حرکتینین ماهییتی و ایستکلرینی اؤز میللتیمیزدن باشقا بوتون دونیا کامواویو و سیاسی گوجلرینه تانیتماق، میللی قازانجلاریمیز اوغروندا آتیلان ان اؤنملی آددیملاردان­دیر. بو اساسدا ایللر بویو سویه­سینددن آسیلی اولمایاراق سورمکده­ اولان چالیشمالاریمیز ، اؤز سونوجلارین وئرمیشدیر.

سون زامانلار ایراندا گئدن اولایلار و ایران گئنل سیاسی دورومو، بوتون دونیانین باخیشینی بو اؤلکه­یه یؤنلتمیشدیر. احمدی نژاد حاکمییتینین سالدیرقان سیاستلری ، ایرانین نؤوه پروقرامی، اسرائیل مساله سی و ان سون یاشیل حرکت دونیانین باخیشینی ایرانا چکمکده اؤنملی رول اوینامیشدیر. میللی فعاللاریمیز ایچینده بو دورومو میللی قازانجیمیز آچیسیندان تهدید و فورصت کیمی ده­یرلندیرنلر اولموشدور. دوروملا باغلی باخیشلارینا گؤره ، میللی حرکتیمیزین نئجه داورانماسی حاقدا چئشیتلی اؤنریلر وئریلمیشدیر. بو اؤنریلرین هامیسین ده­یرلندیرمک گرکلیدیر.شخصیم اولاراق بو دورومدان اورتایا چیخان فورصتلری یاندیرماغی چیخارسیزلیق حئساب ائدیرم. بیز بو دورومدا اؤز تاریخی بورجوموزو یئرینه یئتیرمزسک، گلجکده دورومون ایییلشمه­سینی گؤزلمک ریسکینی قبول ائتمه­لی اولاجاییق و بو توتوم آردی آردینا سؤیکه­نن پاسیولییی حرکتیمیزه آشیلایاجاق، دوشونجه­سینده­یم.

Whopopular آدلی چوخ آدلیم بیر سایت چئشیتلی آلانلاردا دونیانین ان سئویلن شخصیتلری حاقدا اویلاما (سس آلماق،رای گیری) یاپماقدادیر. سیاسی لیدئرلر، آکادمیکلر، ایدمانچیلار، آکتورلار، ژورنالیستلر، موسیقی چیلر و … آراسیندا ان آدلیم شخص لری چئشیتلی اؤلکه­لردن آدای ائدیب و اؤزل بیر مکانیزم­له آیریجا بیر مئیداندا یاریشما کئچیرمکده­دیر. سایتی چالیشتیرانلارین بو ایشده اساس هدفلری آراشدیرمادیرمی؟ تیجاری تبلیغات­می دیر؟ ایلنجه­می­دیر؟ و … باشقا هدفلر؟ بو سورولارین اؤنملی اولدوغو بیر یانا سیته­نین اویلاما سونوجلاری هم قاتیلانلارین باخیشلارین گؤستریر همده بو باخیشلارا تأثیر ائتمک گوجو وار. اویلاما چئشیتلی اؤلکه لرین و میللتلرین بیرتورلو یاریشماسی ساییلیر، هابئله چئشیتلی میللتلرین گوندم ماراقلارین اورتایا قویور. بللی­دیر کی بو باخیشلاری و ماراقلاری اؤیرنمک ایلگیلی قوروملارین ایشینه گلیر.

بونا اوخشار باشقا بیر یاریشما تی وی واسیطه­سی ایله سون ایللرده یاییلماقدادیر. یوروویژن موسیقی یاریشماسیندا چئشیتلی اؤلکه­لرین موسیقی­چی نوماینده­لری یاریشیرلار. هامی­یا بللی­دیر کی بو یاریشما موسیقی باجاریغیندان داها چوخ ، میللتلرین بیر بیرینه باخیشلارین گؤستریر. گئنل دیپلماسی­نین چئشیتلی آلانلاری کیمی، یوروویژن یاریشماسینا اؤلکه­لر گئنیش یاتیریم(سرمایه) یاتیرماقدادیرلار. دؤولتلرین باخیشلاریندان داها چوخ ، میللتلرین باخیشلارینی ائتکی­لمک گئنل دیپلماسی­نین هدفی ساییلیر. بو قونو گونئی آزربایجان میللی حرکتی­نین­ده قاچیرمایاجاغی بیر قونودور.

Whopopular سیته سی یوروویژن کیمی گئنل دیپلماسی مئیدانلارینین بیری­دیر. بو سیته­نین سونوجلارینی اینجه­لمک گئنیش بیر آراشدیرما ایشی­دیر. آنجاق ایلک باخیشدا سیته­نین سونوجلارینا باخان هر کس دویا بیلر کی، هر اؤلکه نین کامواویونون غالیب باخیشی نه­دیر. اؤرنک اوچون سونوجلار ایراندا کوتله­نین سیاستله داها چوخ ماراقلاندیغینی گؤستریر. هیندوستاندا آرتیستلره و سینمایا ماراق داها چوخ اولدوغو اورتادادیر. تورکییه­ده شارقیجیلار، آرتیستلر گوندم­ده­دیر و سیاسی لیدئرلردن داها چوخ میللی لیدئر آتاتورک­ه قارشی سئوگی گؤرونمکده­دیر. ایراندا موسوی نین سس قازانماسی، کئچمیش اوپوزسیون­دان داها چوخ یاشیل حرکتین ایران فعاللارینین گونده­مینده اولدوغون گؤسترمکده­دیر. کوردلرین آدایلارینین یوخاری سس قازانماسی اونلارین کامواویونو گؤستریر، آیریلیقلارینی گؤستریر. اینترنتده داها چوخ فعال اولدوقلارین گؤستریر، فعاللارینین متشکل اولدوقلارین گؤستریر و …

بو اویلامادا هابئله بوتون آلانلاردان داها چوخ سیاسی لیدرلرین سس قازانماسی آنلاملی­دیر.

سونوج اونلارین پوپیولار اولماسیندان داها چوخ، متشکل اولماق و پروفشنال کادرلارا مالیک اولماغی و اوزاق باشی اینترنته الی چاتان سیاسی فعاللار آراسیندا سئویلدیکلرین گؤستریر. یاریشما ایسه اصلینده داها چوخ بو آلاندادیر. بو مئیدانا گیریب اوی وئرنلر باشقا آلانلاردان داها چوخ هدف یؤنلو قاتیلماقدادیرلار. بونون ان قاباریق اؤرنه­یی فارسلارین اویلارینی دییشمه سوره­جیدیر. فارسلار اؤنجه بیر نئچه آدایی گونده­مه گتیرسه­لر و موسوی­یه داها آرتیق سس وئرسه­لرده  ، سون زامانلار چوخ اؤلچولموش بیر حرکته باشلاییبلار. اونلار سیاسی لیدئرلر آراسیندا یالنیز موسوی اوزه­رینده اوداقلانمیشلار (متمرکز اولوبلار) و بوندان داها اؤنملی­سی سون زامانلار آیت الله کاظمینی بروجردی­نی هیزلا یوخاری گتیردیلر. اونلارین بو حرکتی چوخ معنالی بیر حرکتی­دیر.فارس نخبه­لری­نین سیاسی باخیمدان باخیشلارینی گؤستریر. کاظمینی بروجردی سکولاریزمی تبلیغ ائدن و ولایت فقیهه قارشی اولان بیر شخصیت کیمی نئچه ایلدیر زینداندادیر. فارسلار بو شخصیتی دونیا گونده­مینه چکمکله نئچه هدف داشیییرلار. اونلار بئله­لیکله گؤسترمک ایسته­ییرلر کی، ایراندا عقیده اوستونده بؤیوک شخصیتلر زیندانا دوشور و ایشکنجه اولور. گؤستریرلر کی ایراندا سکولاریزم اوستونده زیندانا دوشن شخصیتلر حاکمیتده اولان سیاسی –دینی لیدئرلردن داها چوخ سئویلیرلر. گؤستریرلر کی رئژیمه قارشی اولان سکولار لیدئرلر، رژیم ایچی اصلاحاتچیلاردان داها چوخ  سئویلیرلر. گؤستریرلر کی بئله شخصیتلرین موبارزه­لرینین قدرین-ده­یرین بیلیرلر و اونلاری اونوتمورلار. بو ایسه اخلاقی باخیمدان چوخ اؤنملی مساله دیر.

سوریه­­ده کی اسماعیلییه مکتبینه باغلی اولانلار اؤز لیدئرلرین اورتایا قویوب و یوخاری سویه­ده سس توپلاماقلا، اؤزلرین بوتون دونیایا تانیتیرلار.

وورقولاندیغی کیمی بو سونوجلارین و  باخیشلارین نه­قدر اعتبارلی  اولماسی سؤز قونوسو دئییل. هدف بوتون یئنی اجتماعی حرکتلر کیمی پیام وئرمکدیر. سیاسی جریانلار بئله لیکله بوتون دونیایا پیام وئریرلر  و بو اونلارین سیاسی هدفلرینه اولاشماق یولوندا اؤنملی آددیم ساییلیر. بیر داها وورغولاماق لازیم دیر کی بورادا میللتلرین و اؤلکه­لرین گئرچک گئنل باخیشلارینی گؤسترمکدن داها چوخ، گؤستریلن باخیشین تأثیری سؤز قونوسودور. بیرینجی سیرالارا آدایلارین یئرله­شمه­سی ، باشقالارین او آدای­لار حاقدا اوخوماغا تشویق ائدیر. بونون یانیندا متخصص­لر ایسه داها چوخ بو قونو اوزه­رینده ایشله­ییرلر. اؤرنک اوچون چوخ یوخاری سورعتله دونیادا هله­لیک ایکینجی­لییه چیخان بروجردی حاقدا ، اونون هدفلری و ایندیکی دورومونا گؤره اویلامایا قاتیلان هرکس آرتیق بیلگی­لنمیشدیر.

گونئی آزربایجان فعاللاری­دا بو اویلامانی فورصت بیلیب و بیر نئچه شخصیتیمیزی یاریشمایا آدای ائدیبلر، دوقتور چؤهرقانلی، سید جعفر پیشه­وری ، ستارخان، شیخ محمد خیابانی، آیت الله شریعتمداری کیمی میللتیمیزین آزادلیق اوغرونداکی حرکتلرینی تمثیل ائدن شخصیتلریمیزین بو اویلامادا یئرلشمه­سی ، اؤز یئرینده ده­یرلیدیر. هابئله سون زامانلار بوتون ده­یرلی آدایلاریمیز ایچینده دوقتور چؤهرقانلی اوزه­رینده اوداقلانماق ، میللی حرکتیمیزده سیاسی شعورو گؤسترمکده­دیر. بیزیم اوچون یوخاریدا آدی چکیلن شخصیتلریمیزین هر بیریسی عزیز اولسادا ، بو گونکو جریانیمیزی تانیتماق داها چوخ اؤنملی­دیر. چؤهرقانلی ایللردیر کی میللی حرکتیمیزی تمثیل ائدن بیر شخصیتدیر. اونو بوتون دونیایا تانیتماقلا داها دوغروسو حرکتیمیزی تانیدیریق؛ میللتیمیزه قارشی میللی ظولمو آچیقلاییریق، میللی حکومت قورماق اوغروندا چالیشمامیزی و بو اساسدا باسقس­لارا اوغرادیغیمیزی گؤستریریک؛ اونو تانیتماقلا حرکتیمیزین سیاسی حرکت اولدوغونو ، ایستکلرینی و ایراندا تعیین ائدیجی جریان اولدوغونو اورتایا قویوروق. چؤهرقانلی­یا سس وئرمکله میللی حرکتیمیزی گؤرمزدن گلیب، میللی حرکتین باشی اوستوندن آتیلیب و میللتیمیزه بیرباشا موراجیعت ائدن فارس مرکزچی قووه­لره پیام وئریریک. سون گونلرده گونده­لیک سس باخیمیندان دونیادا اوچونجو یئره چیخان چؤهرقانلی­یا سس وئرمکله میللی حرکتیمیز اؤز بیرلیک گوجونو گؤستردی. بو بیرلیک سوررسه و دونیادا کی ان چوخ سئویلن اون شخصیت ایچینده سونونا دک قالارساق، بو آلاندا اؤز گؤره­ویمیزی یئرینه یئتیرمیش اولاریق.

اؤنری:

یوخاریدا آچیقلانان هدفلره داها آرتیق اولاشماق اوچون ، یئنی بیر اؤنری میللی فعاللاریمیزا سونماق ایسته­ییرم. اومورام بو اؤنرینی ده­یرلندیرمکله میللی قازانجلاریمیزین اؤدنمه­سینده ائتکیلی اولاجاییق. Whopopular سیته سینده یاریشما کئچن آلانلاردان بیری ژورنالیستلر آراسیندا کئچیریلن یاریشمادیر. بو یاریشمادا ایندی­لیک یاشیل حرکته منسوب و ایران مرکزلی دئموکراسی اوغروندا چالیشان زیدآبادی گئتمکده­دیر. زیدآبادی­نین بو میداندا بیرینجی­لیک داشیماسی اؤزوایله چوخ گئنیش پیام داشی­ییر. ایراندا آزادلیق و دئموکراسی ایسته­ین ژورنالیستلرین ایشکنجه­یه و باسقی­یا اوغراماسی ان قاباریق پیام­دیر. بو ژورنالیستلرین ایران اهالیسی طرفیندن سئویلمه­سی ایسه بونون ایکینجی پیامی اولابیلر  بو پیاملار ایران ایسلام جمهوریتینین اعتبارینی دونیادا کورلاماقدا ائتکیلی­دیر.

بیز گونئی آزربایجان میللی حرکتی اولاراق بو مئیدانی بوراخمامالی­ییق. بو مئیداندا دا اؤز هدفلریمیزی یوروتمه­لیییک. میللی حرکت اؤزللیکله گاموحچولار چؤهرقانلی نی گونده­مه گتیرمکله چوخ ده­یرلی ایش گورورلر.

اؤنری:

بونون یانیندا بوگون دوستاقلاردا میللی حرکتی تمثیل ائدن ، ژورنالیست و میلی فعال سعید بی متین­پورو ژورنالیستلر سیراسینا آدای ائدیب، چؤهرقانلی­یا سس وئردیکلری زامان اونادا سس وئرمکله ، چوخ آز زاماندا دونیادا بیرینجی­لیییه قالدیرماق مومکوندور. ژورنالیستلر بؤلومونده­کی سس توپلوسونا و گونده­لیک آرتیما باخساق ، ایندیکی میللی حرکتین سسی­ایله ایکی –اوچ هفته ایچینده بیرینجی­لیک قازانا بیلریک. بو قازانج میللی حرکتیمیزین و میللتیمیزین قازانجی­دیر. بونونلا ده­یر بیلن میللتیمیز و میللتچیلر بیرداها اؤز قهرمانینا سایغی و سئوگی­سین گؤسترجک و میللی حرکتیمیزین هدفلرین هابئله بوگونکو دوروموموزو داها آرتیق بوتون دونیایا تانیتدیراجاق.

آزدمو :

سعید متین پور میللی حرکتیمیزین اسیر سیمگه سیدیر ، سعیدین میللی-دموکراتیک دوشونجه لرینی ساووناراق اونو، گونئی آزربایجانین میللتینه و دونیا  قامو-اویونا داها آرتیق تانیتماق اوچون بو میللی گنج دوشونوروموزه سس وئرمک کامپانیاسیندا اشتراک ائدیب و باشقا حورمتلی شخصیت لریمیز ایله یاناشی سعید متین پور-ا دا سس وئره ک:

http://8.8.247.13/Saeed-Matinpour

1 آوریل 2010 - Posted by | باخیش - دیدگاه, تورکجه - Turkce, حرکت ملی

هنوز دیدگاهی داده نشده است.

پاسخی بگذارید

در پایین مشخصات خود را پر کنید یا برای ورود روی شمایل‌ها کلیک نمایید:

نشان‌وارهٔ وردپرس.کام

شما در حال بیان دیدگاه با حساب کاربری WordPress.com خود هستید. بیرون رفتن / تغییر دادن )

تصویر توییتر

شما در حال بیان دیدگاه با حساب کاربری Twitter خود هستید. بیرون رفتن / تغییر دادن )

عکس فیسبوک

شما در حال بیان دیدگاه با حساب کاربری Facebook خود هستید. بیرون رفتن / تغییر دادن )

عکس گوگل+

شما در حال بیان دیدگاه با حساب کاربری Google+ خود هستید. بیرون رفتن / تغییر دادن )

درحال اتصال به %s