کانون دمکراسی آزربايجان

Azərbaycan Demokrasi Ocağı / Azarbaijanian Democracy Institute

سياسي پلاتفورم: گونئي آزربايجان ميللي دئمکراتیک بيرلي یی / بيرليك


 

«گونئي آزربايجان ميللي دئمکراتیک بيرلي­يي (بيرليكين 27-28 اوكتيابر 2012 تاريخينده استوكهولمدا مٶسسلر قورولتاييندا قبول اولونموش سياسي پلاتفورمو

ايضاح: بو سند و بيرليگ­ين بوتون گله­جك سندلري و ادبياتيندا،«آزربايجان« سٶزو، اوتايلي-بوتايلي آزربايجان­ين ايراده­سيندان آسيلي اولماياراق، ايكي­يه بٶلونموش وطنيميزين گونئي پارچاسي اولان «گونئيآزربايجان« آنلاميندا ايشله­نه­جكدير و يالنيز باشقا بير آنلام نظرده اولاركن، لازيمي قيد­لرله معينلشه­جكدير.

بو سند ده، «آزربايجان ميللي حوكومتي»، ائله دٶولت سياسي قورلوشو آنلاميندادير كي، آزربايجان وطنداشلاري، آچيق و دموكراتيك سئچگي­لر و سايير لئقتيم يول­لارلا، پارلامنت، مجريه و قضائيه سيستملريني ياراديب و آزربايجان اهالي­سي­نين ايراده­سي­نين مجري­سي كيمي ميللترين اٶز موقدراتيني معينلشديرمك حاقي چرچيوه­سينده، آزربايجاني، اٶز گله­جك دٶولتي­نين فورمالاشماسيندا سٶز صاحيبي ائتسين.

گيريش

آزربايجاندا تورك ميللتي، اٶز ايراده­سيني آزادجاسينا اعمال ائتمه­سي­نين ان پارلاق نائيليتي 1324-1325 فاصيله­سينده بٶيوك سيد جعفر پيشه­وري­نين اٶندرليگي آلتيندا ياراتديغي ميللي – دموكراتيك حكومت اولموشدور.

 

 

(سندين پي دي اف فورماتيني آچماق اوچون كليك ائدين)

او حكومت، فارس ماهیتلی دٶولتین سؤمورگه چی­لی­یی و ايرقچي­لي­ييني تمثيل ائدن ايران اوردوسونون غيري لئقال حربي باسقي­سي نتيجه­سينده، قان اييچينده بوغولموشدور.
چوخ ايللر كئچسه­ده، بٶلگه و دونيايه حاكيم اولان شراييط عوض اولموش اولسادا، حقوقي و اخلاقي باخيمدان، آزربايجان، حربي زورلا، سئچدي­يي يولو دوام ائتديرمكدن محروم اولموشدور. بو باخيمدان آزربايجان دٶولت­چي­لي­يي قورماق، اصلينده، غصب اولموش ميللي حاكيميتي»برپا» ائتمك كيمي ديرلنديرمه­لي­دير. بو سبب دن، بيرليك، آزربايجانين ميللي دٶولت­يني قورماغا اينانير و آشاغيداكي پرينسيپلره ده اينانماقلا، اونو برپا ائتمك اوغروندا موجاديله آپارير.

بيرليك، بو سندي و هابئله 21 آذر 2009 تاريخلي آمستردام بياناتي­ني قبول ائديب و آزربايجانين دٶولت­چي­لي­ييني برپا ائتمك مقصديله، دموكراتيك بير نيظامنامه اساسيندا، بيرگه سياسي و مدني فعاليت آپارماق ايسته­ينلردن عيبارت بير تشكيلاتدير.

ميللي قورتولوش

آزربايجان­دا تورک میللتی بوگون ميللي اسارت شراييط­ينده ياشايير. بو میللتین سياسي ايراده­سي­نين ماديت تاپماسي يولوندا ان بيرينجي مانع، ائله بو اسارت­دير. بو اسارته سون قويماق، آزربايجان­ توركلري­نين دموكراتيك ايستكلري­نين ايلك آدديمي كيمي، يگانه و قطعي عملي اولماق فورمو­دور.

بير نورمال دٶولت قورولوشوندا، «دموكراسي»، وطنداشلارين سسلري اساسيندا سياسي حاكميت­ين طالعيني معينلشديرمك­ديرسه، دموكراسي، اسير بير ميلت اوچون، نورمال و دموكراتيك بير دٶولت قورلوشونا صاحيب اولماق معناسي داشي­يير. بو معنادا، آزربايجان­دا یاشایان اینسان، ميللي موباريزه­سي­نین ايلك مرحله­سينده، ميللي قورتولوشا نائيل اولوب و بو غلبه­نين نتيجه­سينده اٶز ميللي دٶولتيني قورماقدان عيبارتدير.

ميللي قورتولوش موجاديله­سي دونيادا مٶوجود اولان موفق تاريخي تجروبه­لردن يارارلاناراق، ميللتين ان گئنيش فيكري طيفلري و سوسيال لايه­لري­نين بيرگه موباريزه­سي اساسيندا مومكون­دور. بيرليك، سياسي پارتيالاري، مودرن توپلوملارين آيريلماز حيصه­سي حئساب ائتدي حالدا،آزربايجان ميللي قورتولوش موجاديله­سي­نين سيرالاريندا هرطرفلي امكداشليق طرفداري­دير.

ميللي دٶولت يولوندا موجاديله گئنيش ميللي قووه­لرين بيرلي­يي­نه داياناراق آپاريلمالي­ديرسه، قورتولوشدان سونراكي «وطنداش حاكميتی»نين تأمين اولماسي اوچون وطنداشلار، اٶز فرقلي سياسي تمايول و ايراده­لريني سياسي رقيب پارتيالار كيمي فورمالاشديرمالي­ديرلار. ميللي قورتولوش موجاديله­سي دٶورونده، ميللي قووه­لرين پارچالانماسي يالنيش و تهلوكه­لي­ اولدوغو كيمي، «وطنداش حاكيميتي»ني قورماق و ايداره ائتمك دٶورونده، پارتيالاشماق، سياسي پارتيالارين رقابتي و سياسي پلوراليسم گركلي­دير. 

مودرن قورتولوش موجاديله سي

آزربايجان ايندي­ليكده دوچار اولدغو سؤمورگه چی بير سيستم­ين قورباني اولماسيندان علاوه، اينسان حاقلاري، دموكراتيك سياسي قورلوش، جينسي برابرليك، اوشاقلاردان مودافيعه، چئوره­ني قوروماق سوسيال عدالت و آزينليقلارين حاقلاريني قوروماق كيمي مسئله­لري ايكينجي درجه­لي گٶرمه­مه­لي­دير.

بيرليك آزربايجان حاكيم راسيسمه قارشي آپارديغي موجاديله­­ايله برابر، اينسانلارين برابر حاقلارينا ناظير بوتون اومانيستي ديرلري اوستون توتمالي­دير.

بيرليك اينانير كي بو حركاتين سيرالاريندا قادينلارين رولو گوجلنمه­لي و اونلارين حقوقلارينا عاييد اولان مسئله­لر دائمي حالدا قابارديريلمالي­دير.بيرليك پاترياركال مدنيت و داورانيش طرزلرينه قارشي­دير و ميللي قورتولوش موجاديله­سيني عئيني حالدا گنجلرين و قادينلارين حركاتي كيمي گٶرور. 

ماكسيماليسم

بيرليك، «هرنه يا هئچ بير شئي» كيمي ماكسيماليستي شعارا اينانمير و آزربايجان ميللي دٶولت­چي­لي­ني برپا ائتمك يولوندا آتيلان آدديملاري موثبت حاديثه كيمي ديرلنديرير. تورك كيم­لي­يي­نين تانينماسي، تورك ديلييني آزربايجاندا تحصيل ديلي و اداره­چي­ليك ديلي ائتمك، تورك ديل آكادمي­سي قورماق، اٶلكه­بويو تورك ديللي­لي مئديا ياراتماق و ميللتلر آراسي ايقتيصادي عدالت بئله­آدديملارين اٶرنه­يي اولا بيلرلر.
بيرليك، آزربايجان طالعينه تأثير گوجونه ماليك اولان هر بير دانيشيقدا، ميللتيميزين بین الخالق حوقوقدا اؤز موقدراتینی تعیین ائتمک حاقینی آرايا قويماق اوچون آكتيو ايشتيراك ائتمه­لي­دير. 

پلوراليسم

بيرليك، آزربايجان سياسي قوو­ه­لري آراسيندا پلوراليستيك موناسيبتلرين حاكيم اولماسينا اينانير. 
بيرليك، سياسي فعاليت فورملاري و سياسي فيكيرلرين چئشيدلي­ اولماسيني طبيعي حساب ائدير و هئچ بير ساحه­ده استانداردلاشديرما و ميللي حركات اوچون موختليف ساحه­لرده «يونيفورم» ايبداع ائتمك ايسته­مير. 
قورتولوش ساواشي دٶورونده، ميللي حركات اوز داخيليندن ميللي موجاديله و دايانيشما سيمگه­لري آرايا قويوب و تبليغ حاقينا ماليك­دير. ميللي هويت اتيكتلري و ميللي سيمگه­لر يالنيز پراكتيك اهميته ماليك اولدوقلاري حالدا و يالنيز لئقيتيم آزربايجان ميللي دٶولت طرفيندن معينلشه بيلر.

ميللي دٶولت­چي­ليك

آزربايجان دٶولت­چي­لي­يي ايكي پلاندا حياته كئچمه­لي­دير: 
آزربايجان توركلري بير ميلت كيمي سياسي ايراده­سيني تمثيل ائتمكله، «ميللي حاكيميت»   national sovereignty تأسيس ائتمك،
تأسيس اولموش آزربايجان دٶولتي­نين وطنداشلاري­، دموكراتيك حقوقي دٶولت قورلوشوندا او جومله­دن آزاد و عدالتلي سئچگي­لرده ايشتيراكيلا، «وطنداش حاكيميتي» popular sovereignty (اينسانلارين، وطنداشلارين، اهالي نين حاكيميتي) قورماق.
آزربايجان دٶولتي، آزربايجانين كومپاكت تاريخي اراضي­سينده قورولمالي و بو دٶولت، آزربايجان­دان كناردا ياشايان توركلرين اوچ سويه­ده حاقلاري­نين تأمين اولماسينا چاليشمالي­دير.
1. ميللي بٶلگه­لرده آوتونوم بٶلگه­لر كيمي (قاشقايي­لر و خوراسان اووشار توركلري).
2. غيري تورك بٶلگه­لرين چرچيوده­سينده، «ميللي آزينليق» استاتوسو صاحيبلري كيمي.
3. غير تورك اراضي ­لرينده ياشايان و غيري تورك دٶولتلرين، تورك وطنداشلاري­نين وطنداشليق و اينسان حاقلاري كيمي.

مودرن آزربايجان و سوسيال عدالت

بيز مودرن و دموكراتيك آزربايجان دٶولتچي­لي­يينه اينانماقلا برابر، او دٶولتي، بير ريفاه و حقوق دٶولتي كيمي يارادماق ايستيريك. علم و تئخنيكا ساحه­لرينده عموم بشري دونيادا الده اولموش سون نائيليتلري اخذ ائديب، بو قلوبال دونيا مدنيتي­نين، آزربايجانا عایيد بٶلومونو ياراتماق. گونئی آزربایجان توپلوموندا استابيل بير دموكراسي­، مطبوعات، صينفي و سياسي تشكيلاتلانما و ويجدان آزادليغي­نين حاكيم اولماسي اوچون، آزربايجان، گوجلو و ديناميك ايقتيصادياتا ماليك اولمالي­دير. بو ايشده، سياسي حاكميت، حقوقي، علمي و تئخنيكي آلت ياپي يارادمالي­دير. آزربايجان دٶولتي لائیک و غيري اتنيك (=مولتي اتنيك) بير دٶولت اولمالي دير. بئله بير دٶولت­ده ائتنيكي آسيملاسيون يئرينه، دونيا اينسان حاقلاري بياننامه­سي اساسيندا، آزربايجان­دا ياشايان بوتون اتنيك قوروپلارين منافع و حقوقلاريني برابر سويه­ده قورومالي­دير. 

آزربايجان دٶولتي حقوقي دٶولت اولمالي و بوتون ساحه­لرده، حاقلاري تاپدالانلاردان مودافيعه ائتمه­لي­دير. اٶرنك اولاراق: 

1. قادينلاردان (پاترياركال عادت عنعنه و حيات طرزي قارشي­سيندا)، 
2. ايشچي­لر و سنديكايي حركتلردن (عدالت­سيزليك و طبقاتي فرقلر قارشي­سيندا)، 
هر باخيمدان آزينليق اولانلاردان (چوخونلوق قارشي­سيندا)، 
3. فرد دن (كوللتيو قارشي­سيندا)، 
4. اوشاقلاردان (يئتگينلر دونياسي­نين زوراكي­ليغي قارشي­سيندا)، 
5. ياشام چئوره­سيندن (حاضيركي نسلين حريص­لي­يي و قيصا مودتلي ايقتيصادي منافع قارشي­سيندا).

آزربايجان دٶولتي مٶظف­دير كي، دونيادا مٶوجود اولان ان موفق مودل­لر اساسيندا، بير هارمونيك توپلوم و سوسيال عدالت­ين تأمين اولماسي اوغروندا، اٶز اوزرينه آكتيو بير رول گٶتورسون. آزربايجان ميللي دٶولتي، گرك كيچيك و ضعيف ايقتيصادي اكتورلاري حيمايه ائديب، و ايش بازاري­نين عنعنوي اولاراق ضعيف قطبي اولان ايشچي­لر و خيردا ايستحصالچي­لارا يارديم ائتمكله، اونلارين مٶوقعلريني، اوز منافعلريندن مودافيعه ائتمكده، گوجلنديرسين. 

اكولوژي مسئله ­لري

بيرليك، آزربايجان­ين اكولوژي­سيني، مينلر ايللردن بري آنا-بابالاريميزين قورويوب، بيزه چاتديريقلاري عوضسيز ايرث كيمي ديرلنديرير و اونون قورونماسيني آزربايجان دٶولتي­نين ان باشليجا تاپشيريقلاريندان سانير. آزربايجان دٶولتي، ياشام چئوره­سي مسئله­سيني قلوبال اكولوژي­نين بيرحيصه­سي حئساب ائمه­لي­ و بو قلوبال مسئله­دن آزربايجان­ين پايينا دوشن پروبلملري چٶزمك اوچون، هر طرفلي لوكال لاييحه­لر حياتا كئچيرمه­لي­دير. آزربايجان اكولوژيسي، هم حاضيركي و هم گله­جك نسيل­لريميزين حيات قايناغي و ياشام چئوره­سي­دير.بو قايناق و بو چئوره هئچ بير شراييط­ده، قيصا مودتلي ايقتيصادي قازانج يا مطاليعه اولونماميش، مسئوليت­سيز لاييحه­لره قوربان وئريلمه­مه­لي­دير. بيرليك هابئله، بو ايلگي­ده اورمو گٶلونو قورماق اوچون گئدن موجاديله­ني، ميللي وارليغيميزي قوروماق و آزربايجاني محو ائيمك قصدلرينه قارشي يٶنلميش بير كامپانيا حئساب ائدير. بيرليك بو يولدا رئال ساييلان علمي-تئخنيكي چٶزوملرين طرفداري­دير و اونلارين تطبيق اولماسي اوچون، بوتون بٶلگه­سل و اولوسلار آراسي قوروم و قورولوشلارلا ايش بيرليگي آپارماغي گركلي بيلير.

ميللتلر دوستلوغو و باريش

بيرليك، دونيا و آزربايجان­ين يئرلشدي­يي بٶلگه­ده بوتون ميللتلرين دوستلوق و باريش ايچينده ياشاماغينا اينانير و بو يولدا توسعه طلب­ليگي وآزربايجان اراضي­سينه يٶنلميش تورپاق ايديعالاريني جيدي مانعه سانير. بيرليك، آزربايجاني اٶز قونشو ميللتريله بيرليكده قلوبال دونيا عائيله­سي­نين لاييق عوضلري كيمي گٶرمك ايستير.

ائكسپريمئنت

مدنيت، واحيد، قلوبال و عموم بشري­دير. مدنيت­ين آيري-آيري ساحه­لرينده اولان يئني­ليك­لر، كشف­لر و ايختيراعلار، عادتا بير دفعه و بشريت عائيله­سينين بير عوضوي طرفيندن آرايا قويولور. آزربايجان دونيا مدنيتي­نين بير حيصه­سي كيمي، بو مدنيت­ين بوتون نائيليتلريني اٶز مدنيتي حساب ائديب، اٶز نٶبه­سينده بو مدنيت­ين اينكيشافينا اٶز تٶحفه­لريني تقديم ائتمه­لي­دير. بو باخيمدان، آزربايجان هئچ و قطعا هئچ بير اكئسپريمنتال تشبوثده بولونمامالي­دير و بوتون ساحه­لرده عموم بشري مدنيت­ين ايمتاحاندان موفقيتله چيخميش تجروبه­لري و نائيليتلريندن فايدالانمالي­دير.

بيرلي­يين آدي­نين نئچه ديلده يازيليشي:

گونئي آزربايجان ميللي دئمکراتیک بيرلي­يي (بيرليك)
Güney Azərbaycan Milli Demokratik Birliyi (BİRLİK)
اتحاد ملي دموكراتيك آزربايجان جنوبي (بيرليك)
The national democratic unity of South Azerbaijan (BIRLIK)
De
n Nationella Demokratiska unionen av Sydazerbajdzjan (BIRLIK)

قایناق :http://www.tribun.com/

11 دسامبر 2012 - Posted by | فارسی

هنوز دیدگاهی داده نشده است.

پاسخی بگذارید

در پایین مشخصات خود را پر کنید یا برای ورود روی شمایل‌ها کلیک نمایید:

نشان‌وارهٔ وردپرس.کام

شما در حال بیان دیدگاه با حساب کاربری WordPress.com خود هستید. بیرون رفتن / تغییر دادن )

تصویر توییتر

شما در حال بیان دیدگاه با حساب کاربری Twitter خود هستید. بیرون رفتن / تغییر دادن )

عکس فیسبوک

شما در حال بیان دیدگاه با حساب کاربری Facebook خود هستید. بیرون رفتن / تغییر دادن )

عکس گوگل+

شما در حال بیان دیدگاه با حساب کاربری Google+ خود هستید. بیرون رفتن / تغییر دادن )

درحال اتصال به %s