کانون دمکراسی آزربايجان

Azərbaycan Demokrasi Ocağı / Azarbaijanian Democracy Institute

آزربایجان میلی حرکتی‌نین بوتون تشکیلاتلارینا خیطاب

حورمتلی آزربایجان میللتی

دیرلی میللی تشکیلاتلاریمیز

سایغی دیر میللی چالیشقان و شخصیت لریمیز

28 مای 1918-ده بویوک دوشونور و میللی اوندر محمد امین رسول زاده نین باشچیلیغیندا قورولان شرقین و اسلام دونیاسینین ایلک دموکراتیک جمهوریتی نین 92-اینجی ایل دونومو موناسیبتی ایله هامینیزی تبریک ائدیب ، رسول زاده نین میراث قویدوغو دوشونجه و سیاست طرزی نین بوگونده ، میللی حرکتیمیزین یول نقشه سی اولابیله جه یینه تاکید ائده رک ، آزربایجان جمهوریتینی قوران سیاسی گوجون ، تزار استبدادی قارشیسیندا روس لیبرال و سوسیال-دموکرات گوجلری ایله یاخیندان ایش بیرلیگی اورنه یینی خاطیرلایاراق ، دیققتینیزی ،  بوگون یاشادیغیمیز سیاسی سوره جین همن تجروبه یه بنزدیگینه جلب ائدیریک.

قهرمان اردبیل شهرینین 7-خرداد 1385 ده گوستردیگی میللی دایانیشما و دیرنیشمه نی تقدیر ائدیب و او قهرمانلیق دولو ، میللی بیلینج تابلوسونو سرگیله ین بوتون سویداشلاریمیزی سئوگی و سایغی ایله یاد ائدیب ، ایندیکی دورومدا و سون گونلرده باشلایان باسقی و بوغما دالغاسی حاقدا فیکیرلریمیزی سیزلرله پایلاشماق ایسته ییریک.

بیلدیگینیز کیمی بوگونلر آزربایجان شهرلرینده حکومت طرفیندن میللی فعاللارا قارشی بؤیوک بیر باسقین ترتیب ائدیلمیشدیر. بو باسقینلار نتیجه‌سینده بو گونه قدر اوتوز نفره یاخین میللی فعالیمیز توتوقلانمیشدیر. توتولانلارین اکثریتی میللی حرکت ایچی معین بیر دوشونجه یه منسوب اولمالارینا باخمایاراق،  بیز بو باسقینی بوتونلوکده میللی حرکته قارشی اولماسینی دوشونمکده‌ییک . اونونلا برابر تورکلره قارشی مختلیف مراسیملر و ییغینجاقلاردا بیر چوخ توهینلرین شاهیدی‌ییک.

باسقی سوره جی نی و سون آیلاردا مباحثه قونوسو اولان ” یاشیل حرکتینه موناسیبت ” مساله سینی و میللی حرکتده  بو قونویا اولان یاخلاسیملاری نظرده توتاراق و حاکیمیتین ایچ و گیزلی محفل لریندن ، سیزان خبرلره گؤره ، حاکیمیت بئله بیر سناریونون گئرچکلشمه سینی تعقیب ائتمکده‌دیر:

1-     ایلک اؤنجه ، کؤکلو و گوجلو تشکیلاتلاریمیزین بیرینه قارشی باسقین ائتسین.

2-     توتولانلاری تهدید ائله‌سینلرکی یا تمامیله اؤز دوشونجه طرزلریندن آییریلمالی ‌یادا آغیر هزینه وئرمگه حاضیر اولمالیدير.

3-     سونرا دا باشقا تشکیلاتلاریمیزا حمله ائدیب، عینی سیاستی اونلارا قارشی آپارسینلار.

4-     سیاسی آلاندا بؤیوک ضربه گؤرن میللی حرکتیمیزده بیر چوخ گنجلریمیز ، میداندا باشسیز و صاحیبسیز قالاجاق… .اونلاری دا بیر باشا میداندان چیخارماق اوچون ایچلریندن یالانچی لیدرلرین اورتایا گلمه سینه میدان وئره‌جکلر.

5-     نهایتا هم بو کاذب لیدرلر واسیطه‌سیله هم ده باشقا گیزلی اللریله…. حرکتی انحرافا چکیب تمامیله منزوی ائدیب ، پرینسیپ سیز گوسته ررک حیثیتدن سالسینلار.

6-     اساس انحرافی یول ایسه ، حرکتی چوخ ساده لشمیش و لمپنیستی تورک–فارس یا دا تورک–کورد داعواسی حدینده آشاغی یئندیرمکدیر..( حکومت و اونا باغلی مئدیا و پان ایرانیست لر فوتبال یاریشلاریندا میللی ، انسانجیل و دموکراتیک شوعارلار و داورانیشلاریمیزی بایکوت و تحریف ائدیب و بوتون توپلوم لاردا اولان کیمی ، تورکلرده بئله چوخ آز ساییلی حاشیه لمپنیسمینی شیشیرده رک دموکراتیک و انسانجیل میللیتچی دالغاسینی ،سپاه و بسیج طرفیندن یونلنمیش لمپنیسم کولگه سینده اولدوغونو تبلیغ ائتمکده دیر ) بئله لیکله ایچریده حکومتی تهدید ائده‌جک گوجلرین بیرلشمه‌سی عوضینه اونلارین انرژیلرین بیر –بیرینه قارشی هدره وئریب یورسونلار.

7-     بئله بیر دورومدا حاکیمیت اؤزونو ایرانین میللی قهرمانی کیمی اورتایا گتیریب، هامینی یئرینده اوتوردوب، نئچه ایل داها حکومتینی دوام ائتسین. سؤز یوخ کی بو آرادا ایلک غالیب، حاکیمیت و فارس شوونیسمی اولاجاقدیر.

یوخاریدا سوندوغوموز قورولموش توزاغی نظره آلاراق ، میللتیمیزی آرتیق دویارلی اولماغا چاغیریب ، بوتون میللی تشکیلاتلاریمیزدان ، مئدیا اورقانلاریمیزدان ، ائله‌جه ده میللی شخصیتلریمیزدن ایسته‌ییریک:

1-     سون باسقینلاری (هر هانسی تشکیلاتا قارشی اولماسینا باخمایاراق) قطعیا محکوم ائتسینلر.

2-     حاکیمیتین بو شیطانی نقشه‌سینی ایفشا ائدیب، میللی فعاللاری و اونلارین واسیطه سیله ده بوتون خالقیمیزی  آییق سالسینلار.

3-     بوتون سیاسی پلاتفورملارا حورمتله یاناشاراق ، خالقیمیزی هر زامان کی کیمی مدنی داورانیشلار و شوعارلارا چاغیریب و  یوخاریدا سوزو گئدن دوولت الینده اولان و میللی حرکت و میللی پرینسیپ لریمیزین قارشیسیندا اولان تورکلوک عنعنه و سنت لرینه ضد ، لمپنیستی داورانیشلار حاقدا ، اوزه ل بیلگی لندیرمه ، اویره تیم ، آنالیز و پروپاگاندا برنامه سی حاضیرلاییب ، هرکسی دویارلی اولماغا چاغیریب ، میللی منافعیمیزی قوروسونلار.

7-خرداد 1389

آزربایجان دموکراسی اوجاغی

29 مِی 2010 Posted by | بیانیه - آچیقلاما, باخیش - دیدگاه, تورکی, تورکجه - Turkce, ترکی, حرکت ملی | , , , , | بیان دیدگاه

حورمتلی حضرت آيت الله بيات زنجاني یه آچیق مکتوب

حورمتلی حضرت آيت الله بيات زنجاني موبارک محضرینه – دامت افاضاته –

سلام و سایغی لار ایله

بو مکتوبو بیر آی اونجه ،  مبارک حضورونورا تقدیم ائتمک ایسته ییردیک، آنجا بیر بویوک مناسبت و بایرام – ین یاخینلاشماسی نا گوره ، ال ساخلادیق ، بو بایرام دا ( روز جهانی زبان مادری )  آنا دیلینیز آزربایجان تورکجه سبنده یازیلمیش بو مکتوبو ، بیر هدیه و بایراملیق اولاراق قوللونوغوزا تقدیم ائتمه یی مصلحت گوردوک.

آیت الله بیات زنجانی

2– اسفند (21 فوریه ) ، دونیا آنا دیلی گونونو تبریک ائدیر و بو هدیه و آرمانی تقدیم ائده رک، اجازه آلیب و  نئچه اوره ک سوزوموزو حضرتعالی –نین محضرینده پایلاشماق ایسته دیک. حورمتلی حضرت آيت الله!  – کئچن آیلاردا و انتخابات سونراسی ، آزاده مرجع لریمیز باشدا ( باشدا حضرتعالی و رحمتلیک منتظری ، استبداد علیهینه مخالفت و اسان حاقلاری ، جمهوریت و  میللت حاقلاری و آزادلیق مبارزه سینده ، یئنی دوشونجه و فقهی فتوالار اورتایا قویوب و چوخ مهم بیانات یایمیشدیلار ، مخصوصا جنابعالی نین و رحمتلیک آیت ا… منتظری نین ایراندا  ملی و ائتینک گروهلارین دیل و میللی مساله لری حاقدا یایدیغینیز بو آچیق – آیدین فکرلریزی بیر استراتژیک آددیم اولاراق گوروب و سیزه جان ساغلیغی و رحمتلیک آیت الله منتظری – یه رحمت آرزو  ائدیریک.

–  رحمتلیک آیت ا… منتظری نین ، قتواسی داوامیندا ، سیزین بو اوغورلو فتوانیز ، دین عالیم لری و عالی شیعه مرجعیت- ینین ، ایرانین واقعیت لرین و دیل – میللی مساله سینده بیلگی و معلوماتا صاحب اولدوقلارینی و بوتون دیل لر و فرهنگلرین حفظ ائدیلمه سینده، صداقتلی داوراندیقلارینی گورسه دیر. باشقا طرفدن سیزین تورک اولدوغوزو  و  تورک عالیم لرینین ، آزربایجانلی و تورک دین آداملاری نین ، اوز دیل و میللی حاقلاری موضوعوسوندا ، سکوت و خودسانسوری لرینی ، گوز قاباغینا آلاندا ، حضرتعالی نین بو نظرلرینین اهمیتی داهادا آرتیر و یاخین گله جکده ، تورک مراجع و عالم لرین ، ایراندا تورکلرین ، مشروع و قانونی دیل و میللی حقوق لاریندا ، آرتیق چالیشما ، آیدین لاتما و مجاهدت ائده جک لرینه اومود یارادیر.

– ایران دوولتی ، ایراندا یاشایان میلیونلارجا تورک انسانلارین مادی و معنوی منافعینی گورمه دن ، مسلمان آزربایجان تورپاقلارینی اشغال ائدن دوولت ایله چوخ یاخین ارتباط لار قورموشدو ، بیزیم نظریمیزجه بو یاخینلاشما ، ایرانین ملی منافعی ایله تام ضددیر  ، بو اساسدا بعضی حورمتلی دینی عالیم و مرجع لر ، بئله مشابه مساله لرده » ایکی – استاندارد » لی رفتار ائدیب و قونشولوغوموزداا ، مسلمان تورپاقلارینین اشغال ائدیلمه سینی ، ساکت ، تماشا ائدیرلر ، معلوم دور کی بو رفتارلار ، انسانلاریمیزین ذهنینده ، دین حاققیندا و دینی وظایف حاققیندا  چوخ جدی سوال یارادیب و بوتون آزربایجان تورکلری بو مساله حاققیندا ، نگران لیق ایله ، عزیز مراجعین کمک و ارشادلارینی طلب ائدیرلر.

آنجاق بونلارا رغما ، حضرتعالی نین ، آزربایجان و قاراباغ شیعه لریندن دفاع ائدیب و هر جوره کمک و یاردیمین مشروع اولماسینی ببیان ائتمه ییز ، بو تورپاقلارین باریش و صلح یولو ایله آزاد ائدیلمه سینده بویوک و تاریخی آددیم دیر ، اومود ائدیریک بو مهم آددیم لار و اسلام دونیاسینین چتین لیک لری حاقدا احساس مسئولیت شرعی داوام ائدیب و بو اقدام باشقا عالم و مراجع لرین داورانیش و رفتارلارینا بیر نمونه اولسون.

– ایراندا دموکراسی ایسته ین بوتون دوشونجه لرین بیرلیگی ، دموکراتیک لشمه سوره جینده اونملی و بیرینجی لازم فاکتوردور ، بو اساسدا ، یاشیل حرکتین و مذهبی رهبرلرین ، ایراندا تورک میللتی نین ایستک لرینی تانیییب و اوندان دفاع ائتمه سی چوخ اهمیت لی دیر ، بو اقدام گئج اولورسادا ، مثبت اقدام ساییلماقدادیر. – جنابعالی نین تورک دیلی و وارایغینی قئید ائدیب و ضد تورک و پان آریایی کلمه لر اولان » آذری » کلمه سیندن استفاده ائتمه مه یینیز ، پان آریایی و ضد تورک سیاستلرین اثرسیز اولدوغونو و آزربایجان میللی – دموکراتیک حرکتی نین گوجونو گوسترمکده دیر. بو مجعول و قوندارما آدلار و تاریخ دوزلتمه لر ، دوولتین بوتون تبلیغاتی سیاستلرینه رغما ، نتیجه سیز قالیب و تورک لرین تام گوج ایله اوز حقیقی » تورک » وارلیق لارینی قورویوب و بو فاشیستی سیاستلره اویمامالارینی نمایش ائتمکده دیر.

– فارس دیللی مئدیا و مطبوعات ، جنابعالی نین بو  اهمیتلی فتوا و گوروشلرینی سانسور ائتمه سی ، هله ده ایران مئدیاسیندا آنتی تورک جریانلارین اولدوغونو نشان وئریر ، بیز بو سانسور و بایکوت داورانیش لارینی محکوم ائدیب و ایراندا تورک میللتینه اولان تبعیض لرین سونا چاتماسینی طلب ائدیریک  حورمتلی حضرت آيت الله بیات زنجانی – جنابعالی بیلدیگینیز کیمی ، ایراندا  آنا دیلینده تحصیل آلماغی ایسته مک ، تورک دیلی و وارلیغینی قوروماغا چالیشماق گناه و بویوک اتهام ساییلیب و حکومت طرفیندن شدت ایله سرکوب ائدیلمکده دیر ، یا دانشگاهلاردا بو فرهنگی چالیشانلار درس دن محروم اولوب بعضا حبسه محکوم اولورلار ،  حال حاضیردا دا اونلار آزربایجانلی بو اتهام لار اساسیندا و آنا دیلیمیزی ایستمک گوناهی اوچون زنداندادیلار ، بو شخص لردن بیری سایین سعید متین پور – زنجان شهریندن – 8 ایل حبسه محکوم اولوب و ساغلیق دورومونون آغیر اولماسینا رغما درمان ائدیلمکدن محروم قالمیشدیر.

سایین آیت الله !

-زنداندا اولان فردلرین خانواده سی و عموم آزربایجان فعال لاری ، دینی مرجعیت و خصوص ایله سیزدن بو موضوعدا حساسیت گوزله ییر ، لوطفا تورک زندانی لریده باشقا سیاسی محبوس لار کیمی توجه و عنایت لریزدن یوخسون بوراخمایین. -سئچیم ( انتخابات ) سونراسی اولان اعتراضلاردا آزربایجانلی لارین و باشقا میللی – ائتنیک گروهلارین ( مثلا کوردوستان ) ساکت قالماسی ، ایراندا مرکز- پیرامون مساله سینی و آرادا اولان چات و شکافی چوخ آچیق نمایش ائتدیردی ، بو فاصله لی داورانماغین و اعتراضلارا قاتیلماماغین بویوک دلیلی اورتادا اولان میللی – دیل تبعیضلری و اقتصادی آیری سئچگی لیک ( تبعیض ) و سانسور- بایکوت سیاستلری دیر.

-سایین حجه الاسلام کروبی نین انتخابات برنامه سینده آزربایجلی لارین ایستک لرینه  یئر ورمه سی و رحمتلیک آیت الله منتظری نین تاریخی فتواسی نین آردیندان ، جنابعالی نین بو گوروش و فتوالاریز چوخ اهمیت لی دیر کی داوام ائدیب و درین لشمه سی ، ایراندا آزادلیق و دموکراسی ایسته ین گوجلرین بیرلشمه سینه مثبت بیر زمین یاراتمیشدیر ، تاسفله سایین مهندس میر حسین موسوی نین بو قونوداکی گوروشلری یئترسیز و بعضا ابهاملی اولموشدور. بیزجه بوتون گوجلر اورتادا اولمادان اصلاحات و دمکراتیک لشمه نتیجه سیز قالاجاق.

-بیر داها جنابیزی بو اهمیت لی گوروش و نظرلردن دولایی تقدیر ائدیر و باشقا مذهبی ، سیاسی رهبرلر و گروهلاری بو تبعیض لری آرادان قالدیرماقدا مثبت و دوزگون داورانماغا دعوت ائدیریک.

2 اسفند 1388- تبریز

آزربایجان دموکراسی اوجاغی

نامه سرگشاده به محضر حضرت آیت الله العظمی بیات زنجانی – دامت افاضاته

8 مارس 2010 Posted by | بیانیه - آچیقلاما, باخیش - دیدگاه, تورکجه - Turkce | , , , , | بیان دیدگاه

   

%d وب‌نوشت‌نویس این را دوست دارند: