راديكال هدفلي ميللي حركتيميز و ايليملي ميللتچي لر

سعيد متين‌پورون گؤگسل دويغولارينا سونورام
اومود ايلقارلي

گونئي آذربايجان تورك ميللتي بو گون محكوم ميللت اولاراق ، فارس ميللتينين اسارتي آلتيندادير. 63 ايل اؤنجه گونئي آذربايجاني ايشغال ائدن و ميللي حاكميتيميزه سون قويان فارس شوونيستلري، هله ده اؤز ايرقچي سياستلرين يوروتمكده‌دير. گونئي آذربايجان كلاسيك ايستعمار بيچيمينده ايشغال اولسادا ، سونرالار فارس حاكميتي بو ايشغالي سورمك اوچون يئني ايستعمار متدلارين قوللانميشدير و قوللانماقدادير.
بيلينديي كيمي ، گيزلي و يوموشاق  اولان يئني ايستعمارا قارشي موباريزه ، كلاسيك ايستعمارا قارشي موباريزه دن قات قات چتين اولور. ايستعمار ايدئولوژي‌سي هم حاكم ميللتين هم ده  محكوم ميللتين دونيا گؤروشونو ، باغليليق‌لاريني و ابنانج‌لاريني اولوشدورور. بونا گؤره ده سون ايللرده باش قالديران ميللي قورتولوش حركتيميزين اساس اوغراشي‌لاريندان بيري ميللي اويانيش اولموشدور.

ايستعمار محكوم ميللتي تحقير ائتمك‌له، اؤزوندن اوزاقلاشديرماقلا ، اؤزگوونجين آلماقلا و حاكيم ميللتي سئوديرمك و يوكسلتمكله اؤز ايراده‌سين حاكيم ائدير.بو سياستلرين سونوجو اولاراق ايستعمار پسيخولوژي سي‌ اورتايا چيخير. ميللي حاكميت قورماق اوچون، بو ايستعمار پسيخولوژي‌سين آشاراق موباريزه دويغولاري ياراتماق گركلي‌دير. بو ايشلم بويوك انرژي ايسته‌يير.ايللرله اؤزونو محكوملوغا لاييق گؤرن و باشقا ميللتلره آشاغادان باخان بير ميللتده ،ميللي حاكميت اوچون موباريزه يه بويوك بير انگيزه (دورتو) اولماليدير. بو انگيزه ني ميللي قورتولوش ايدئولوژياسي واسطه‌سي ايله ياراتماق اولار (ايستعمارا قارشي ايدئولوژيا آراجي ايله). ان عاجيل واستراتژيك هدف ساييلان ميللي حاكميتين قورولماسي ، اسير ميللت اوچون چوخ راديكال بير هدف ساييلير. اسيرليك دوروموندان آزادليق دورومونا و محكوملوق وضعيتيندن حاكيمليك قونومونا كئچمك كوكلو بير قونوم ده‌ييشيمي دير(تغيير جايگاه). كوكلو ده‌ييشيملر ايسته‌ين و سورونلاري كوكدن چؤزمك ايسته‌ين بير حركت، راديكال حركت ساييلير.

اولكولر (آرمانلار) مبللتلره انگيزه وئرير ، جوشقو يارادير. اولكولر هميشه اولو و بويوك اولماليدير. كيچيك هدفلر اوچون اسير ميللت تهلوكه‌يه گيرمز، موباريزه‌يه كئچمز.

ميللي حركتيميزده اساس هدفلريميزدن بيري ميللي اويانيبش ياراتماق و اؤزميللتيميزده موباريزه دويقولارين اوياتماقدير. اؤز ميللتيميزده اوجاليق دويقولارين ياراتماقدير. بو اوجا گويوللويو و غرورو ياراتماق اوچون ، ميللتيميزه يؤنه ليك چيخيشلاريميز و سسله‌نيشلريميز راديكال اولماليدير.
ايرلي سورولن هدفلر ، موباريزه يه ده‌ير هدفلر اولماليدير. گرچك و ايچدن اينانديغيميز اولكولري ميللتيميزله پايلاشمالي‌ييق. كوكدن ده‌ييشيم ياراتماق ايسته‌ديييميز ميللتيميزه آيدين اولماليدير. بو ده‌ييشمدن ميللتيميزه گؤزل گورونتولر سونمالي‌ييق.

ميللي قورتولوشوموزدا اؤز ميللتيميزدن باشقا آيري فاكتورلارين دا ائتكي سي وار. باشقا قوروملارين دا باخيش و داورانيشلاري گله‌جه‌ييميزده تاثيرلي‌دير. ايران ايسلام حاكميتي‌نين ميللي حركته نئجه ياناشماسي ، فارس ميللتي و اؤزلليكله نخبه‌لري‌نين ميللي مسئله‌يه باخيشي ، قونشو و دونيا اؤلكه‌لري‌نين قازانجلاري و باخيشلاري و ….. كيمي عاميللر گله‌جه‌ييميزده ائتكي‌لي‌دير. ميللي حركت بير سيستم اولاراق بو ائتكنلره اؤز تاثيرين بوراخماغي هدفله‌مه‌ليدير.بو عاميللرين ايچينده فارس ميللتي ايله نئجه ياناشماق، حركتيميز ايچينده چوخ تارتيشيلان قونولاردان اولوب .
حركتيميزده ميللي كيمليك سورون اولدوغو اوچون ، فارس ميللتيندن اوزاقلاشما و آراميزدا اولان چاتلاقلارين درينلشمه‌سي گوندمده اولوب.
ايللر بويو ميللتيميزي فارس ميللتي ايچينده اريتمه‌يه چاليشان ، ميللي كيمليييميزي آرادان آپارماق ايسته‌ين شوونيستي سياستلره  قارشي ، ميللي كيمليك آختاريشي و ميللي كيمليييميزي قوروماق و فارسلارلا آيريملاريميزا(فرقلريميزه) اؤنم وئرمك حركتيميزين دوغال تبكي سي اولوب.
فارسلارلا هر هانسي اورتاق يؤنلريميز بيزي اريتمكده و اؤزگه‌لشديرمكده شوونيسم طرفيندن قوللانيلميشدير. بو اوزدن اورتاق يونلرين قابارماسيندان دوغال اولاراق قورخموشوق. آرا-سيرا فارسلارلا اورتاق سياسي – ايجتيماعي ايستكلريميز بئله، گله‌جه‌ييميزه بير تهلوكه كيمي آلقيلانير. بو اورتاق ايستكلر اساسيندا ، فارس نخبه‌لري ايله انلاشمايا چاليشان و بونون كولگه‌سينده اونلاري فاشيستي باخيشلاردان ائنديرمه‌يه چاليشان يولداشلاريميزين حركتلرينه بئله ، قوشقو ايله باخانلاريميز وار.
يوخاريدا وورقولانديغي كيمي ، بو شوبهه‌لرين يارانماسي اسير ميللتين ميللتچي‌لرينه دوغالدير.

آنجاق پراگماتيسم (يارارجي ليق) و رئاليسم آچي‌سيندان باخيلديقدا ، فارس ميللتي نين باخيشلاري‌ني ده‌ييشمك شوونيسم جبهه‌سي‌ني ضعيفلتمك دئمكدير. پاك آريا ايرقي و شيرين فارس ديلينه اينانان ، توركلري گلمه سايان ايرانچيلار اوچون «بير ديل بير ميللت ايلكه‌سي» ده‌ييشرسه ، تورك ميللي حركتينه قارشي نيفرتلري آزالارسا ،كئچميش سياستلري‌نين يانليش اولدوغونو آلقيلايارلارسا او زامان ميللي حركته قارشي واحيد جبهه ده بيرلشمه‌لري چتين اولار. فارس ميللتي و فارس ديلي‌نين اوستونلويو حاقدا اينامي اولمايان بيريسي غيرفارسلارين اؤز آناديلينده اؤيره‌تيم ايسته‌مه‌لرينه قارشي ديرنمه‌سي چتيندير.

ميللي حركاتيميزدا دوشمنه قارشي موباريزه‌نين بير بؤلومو پسيخولوژيك ساواشدير.
قارشي طرفين ساواشدا حاقسيز اولدوغونو آشيلاماق ،سؤيلملريني كوكسوز گؤسترمك بو موباريزه‌نين بير بؤلومودرو. بو هدفلري گرچكلشديرمك اوچون فارسلارلا ايليشكي ده اولماق گركير.
حركتيميزده ايليملي(ميانه‌رو) فعاللار كيمي تانينان بير سيرا يولداشلاريميزين بو آچيدان ده‌يرلي چاليشمالاري اولوب. بو يولداشلاريميزين ايرلي سوردوكلري هدفلر آچيسيندان ، ايليملي گورونتولري وار. بورادا ميللي حركتيميزين راديكال هدفلرينه اينانج ، سؤزقونوسو دئييل. ساده‌جه ايرلي سورولن هدف و قوللانيلان سؤيلم سؤز قونوسودور.

اونلار بو سؤيلملرله و ايليملي ياناشما ايله ، فارس نخبه‌لرين سؤيلم ساواشيندا اوغراشديرماقداديرلار. بو سؤيلم ساواشي، شوونيسم جبهه‌سيني سارسيتماقدادير. سويلم و ائيلم ده ايليملي ياناشان ميللتچي‌لريميزين ،هدف قوروپو فارس نوخبه‌لريدير. راديكال اولكولريميزي يانسيدان ميللتچي‌لرين ايسه ،هدف قورومو اؤز ميللتيميزدير. بو ايكي ميدانين هربيري‌نين اؤز قوراللاري وار. ميللتيميزه يؤنه‌ليك سويلمي(گفتمان) فارس نوخبه‌لرينه قارشي اويقولاماق ايسته‌نيلن سونوجو وئرمز و ترسينه فارس
ميللتينه و نخبه‌لرينه يؤنه‌ليك ايليملي سؤيلمي ميللتيميزه اويقولاماق ايسته‌ديييميز انرژي و هيجاني ياراتماز.

حركتيميزين گئنل ادبياتي و سؤيلمي راديكال اولدوغو اوچون ، ايليملي يولداشلاريميزين داورانيشلاري و سؤيلملري آرديجيل ائلشتيريلير. منجه بو اينتقادلاردا موباريزه ميداني نين اؤزلليك‌لري و قوراللاري نظرده آلينمالي‌دير. مشروطه حركاتي‌ني بوگونكو قوشوللار اساسيندا نقد ائله‌مك و ده‌يرلنديرمك دوز اولماديغي كيمي ، فارسلارا يؤنه‌ليك سياستلري اؤز ميللتيميزه يؤنه‌ليك ميدانين قوراللاري اساسيندا ده‌يرلنديرمك دوغرو اولماز.

بو قونويا ياناشمادا باشقا بير چليشكي‌ده اورتايا چيخير. ايليملي ميللتچي‌لريميز تكجه فارسلاري ائتكي‌له‌مكله يئتينمه‌ييب (كفايتلنمه‌ييب) ، حركتين گئنل فعاليتلري‌ايله ده اوغراشيرلار. داها دوغروسو بو يولداشلاريميز ايكي ميداندا چاليشيرلار. آذربايجان ميللتي‌نين اؤنجول ميللي دئموكراتي سعيد بي متين‌پور ، عليرضا بي صرافي ، اكبر بي آزاد ،حسن بي راشدي ،سعيد بي نعيمي ، حسن بي رحيمي ،توكل بي غني لو و… كيمي ده‌يرلي ميللتچي يولداشلاريميز ايللر بويو چاليشمالاري‌ايله ايچدن ميللتچي
اولدوقلارين ثوبوت ائتميش و بو يولدا آغير هزينه‌لر وئرميشلر. بونون يانيندا ايسه فارس نخبه‌لرينه تاثير ائتمك مقصدي‌ايله اونلارلا آراسيرا ايليشكي لر قورماغا چاليشميشلار. قاتي شوونيست اولان فارس نخبه‌لري‌ايله اوغراشماق نه قدر چتين اولسادا ، بو يولداشلاريميز يورولمادان اؤز چاليشمالارين  سورمكده‌ديلر. فارس حاكميتي و فاشيست پان ايرانيستلر بو اينسانلارين اؤنملي چاليشمالاريندان اوركمكده ديلر و اونلارا قارشي آرديجيل باسقي لار وار. ده‌يرلي يولداشيميز سعيد بي متين پورا قارشي دويارلي ليق(حساسيت) و اونا وئريلن 8 ايل حبس جزاسي بونون بير اؤرنه يي دير.

بير سيرا كور راديكال ميللتچي‌لر بو ايليملي ميللتچيلرين چاليشمالاريني ده‌يرلنديرمه ده ، وورقولاديغيم ميدانلارين قوراللارين نظرده آلميرلار.
حاكميت طرفيندن باسقي لارا دؤزولسه ده،  ميللتچيلر طرفيندن سوچمالار اوزوجودور. راديكاليزم حركتيميزين اؤزل لييي اولسادا، بو راديكاليزم پراگماتيسمي(يارارجي ليغي) پوزماماليدير. ايللر بويو آغير هزينه‌لرله يئتيشميش شخصيتلريميز ميللتيميزين سرمايه‌سي ساييلير. بو سرمايه لري يئرسيز سوچلامالارلا گؤزدن سالماق ميللتيميزين يوخ ، فاشيست حاكميتينين قازانجينادير. حركتيميزين راديكال‌ليغي ،بو اينسانلاري گوجدن سالمامالي اونلارا داها آرتيق گوج وئرمه‌ليدير. بونونلا ياناشي حركت اؤز راديكال هدفلا چيزگيسين سورمه ليدير. بو يؤنتم گرچكجيل راديكاليزمين گؤستريشي دير.