کانون دمکراسی آزربايجان

Azərbaycan Demokrasi Ocağı / Azarbaijanian Democracy Institute

» آذربایجان دانیشیر » مانیفستینین آلتینجی ایل دونومو قوتلو اولسون

اونوموزده اولان 7 تبر گونو آذربایجان تاریخینده اونملی اولان » آذربایجان دانیشیر » مانیفستینین یاییلماسینین آلتینجی ایل دونومودور.

بو مانیفئستین یاییلماسی بیرینجی دفعه اولاراق تورک – آذربایجان میللی ایستکلرینین گئنیش یاییلماسینا سبب اولدو و حرکتیمیزین دئموکراتیک و انسانجیل اوزونو بیر بوتون اولاراق گوزلر قاباغینا سرگیله دی .

» آذربایجان دانیشیر » میللتیمیزین ایستکلرینی چاغداش دونیایا اویغون بیر دیلده بیان ائتمه یی باشاردی و باشقا میللتلرین ماراغینی چکه رک بیر اورنک حالینا گلدی .

» آذربایجان دموکراسی اوجاغی » بو سندده بیان ائدیلمیش و میللی فعاللاریمیزین حیمایه سینی قازانمیش ایستکلرین ، بو گونده اونملی و میللی حرکتین یول نقشه سی اولدوغونا اینانیر و یئترینجه ایستک لریمیزین آچیقلانماسیندا چالیشاجاقدیر.

آذربایجان میللتی بو سند ده  بیان ائتدیگی « بيز بوتون ايستكلريميزي دينج يوْللارلا ساغلاماغي دوشونوروك. بيزجه بوتون دينج چاليشمالار، او جومله‌دن تحصّون، ييغينجاق، ميتينگ، اعتيصاب و رفراندوما چاغيريش ميلّتيميزين اؤز حاقلارينا چاتماسيندا ان طبيعي حاقلار كيمي دَيَرلنديريلمه‌ليدير » مبارزه مئتودلارینی اوچ ایل سونرا خورداد اولایلاریندا قوللاندی و تاریخیمیزده یئنی دایانیشما طرزینی دونیایا اویره تدی.

یئنی قوشاغین ( نسلین ) تانیشلیغی ایچین ، مئدیا اورقانلاریمیزدان بو مانیفستین یئنیدن یاییلماسینا یاردیم ایسته یه رک ،» آذ. دئموکراسی اوجاغی » آدیندان » آذربایجان دانیشیر » مانیفئستینین آلتی اینجی ایل دونومو موناسیبت ایله بوتون آذربایجان میللتینی ، سایغی ده یر چالیشقانلاری و بو مانیفستی حاضیرلایان سایین فیکیرداشلاریمیزی تبریک ائدیریک.

آذربایجان دموکراسی اوجاغی

6 تیر 1388

» آذربایجان دانیشیر » ین تورکجه ، فارسجا و اینگیلیسجه سی

6 مارس 2010 Posted by | بیانیه - آچیقلاما, تورکجه - Turkce | , , , , | بیان دیدگاه

آذربايجان دانيشير:

ايرانين شرفلي اهاليسي،
عزيز وطنداشلار،

بؤيوك مشروطه اينقيلابيندان بوُ گونه‌دك اؤلكه‌ميزين عدالت و آزادليق‌سئور گوجلري چاليشميشلار كي، آزادليق وعدالتي برپا ائديب، ايران وطنداشلاريني اؤز ايجتيماعي و فردي حوقوقلارينا ناييل اوْلماقدا يارديم ائتسينلر.
ميلّتيميز تاريخ بوْيو بير چوْخ موستبيد شاهلارين اؤزباشيناليغي‌نين شاهيدي اوْلموشدور. اوْنلار اؤز حاكيميّتلريني ساخلاماقدان اؤترو هر نؤوع جينايته ال آتميشلار. لاكين بشريّتين موکرّر تجروبه‌سينه اساساً ظولم قالاسي دئييل.
1357- ده سلطنته قارشي اينقيلابين هدفي ائله همين جومهوريّت و دموكراسي قوُرماق تجروبه‌سي كيمي دَيَرلنديريله بيلر.
اوْ عظمتلي اينقيلابين تاريخيندن 25 ايل كئچديگينه باخماياراق، اساس سوُآل بوُندان عيبارتدير كي ، گؤره‌سن ايران خالقي اؤز ميلّي ايستكلرينه ناييل اوْلوبمو؟
يقين كي، كئچميش سهولري آراشديريب، تانيتماق گله‌جكده بير ماياك كيمي ميلّتيميزين يئني دموكراتيك حركتي‌نين يوْلونا ايشيق ساچاجاقدير.
بئله آنلاشيلير كي، اؤلكه‌ده دموكراتيك بير دوزن قوُرا بيلمه‌مگيميزين باشليجا عيلّتلري دموكراسي آنلامي‌نين دوزگون معناسيني بيلمه‌مك، اوْنو بير تئوريك ساحه كيمي اله آلماماق، هابئله دموكراسي‌نين تمليني تشکيل ائدن ضرورتلره، اؤلكه‌نين مدني، ايجتيماعي، ايقتيصادي، كولتورل، ائتنيك و مذهبي قوُرولوشونا گؤز يوُمماقدير.

بئله بير حالدا دموكراسي و جومهوريتين نه اوْلدوغوندان آچيق و آيدين بير پرسپكتيو آچيب، گؤسترمك، آزادليق‌سئور و دموكرات گوجلرين بير- بيريله تانيشماسينا و اهالي‌نين اکثريتي‌نين ايسته‌ديگي قوُرولوشا ناييل اوْلماسي اوُغروندا اوْنلارين بيرلشيب، ايش‌ بيرليگي آپارمالارينا سبب اوْلا بيلر.
بيز، بوُ سنده قوْل چکن بير قروُپ آذربايجانلي آراشديرماچي، موتفکّير، يازيچي، اوُنيورسيته اؤيرنجيسي و كادرلاري، شاعير، قازته‌چي و سياسي فعاللار عوموم ‌خالق دموكراسي جبهه‌سي قوُرماق ايسته‌ين باشقا هموطنلريميزي حيمايه ائده‌رك،‌ ايران آزادليق حركاتي‌نين اساس يؤنلري و باشليجا مقصدلري حاقّيندا اؤز دوشونجه‌لريميزي بيلديرمك ايسته‌ييريك:

1 –  ميلّي ايستكلري الده ائتمك اوچون اساس شرط دموكراتيك جومهوريّتلرده اوْلان تانينميش اوصول يوْلو ايله دموكراتيك قوُرولوشا كئچمك و بيرلشميش ميلّتلر تشكيلاتي‌نين اينسان حاقلاري اوزره بيان‌نامه‌سي و اوْنون ضميمه‌لرينده قئيد اوْلونان فردي و ايجتيماعي حوقوق و آزادليقلارين قوْرونماسيدير.

2 – اؤلكه‌نين ائتنیك قوُرولوشو، جوْغرافيا گئنيشليگي، و تاريخي كئچميشينه باخاراق، ايراندا فدراتيو بير سيستمين يارانماسي قاچينيلمازدير. كئچن يوز ايلده مشروطه و ايسلام جومهوريسي آنا ياسالاريندا اوْلان مشهور ايالتي و ويلايتي انجومنلر و ايسلام شورالاري مادّه‌لري، همين فدراتيو سيستمين يارانما ضرورتيني گؤسترمكده‌ اوْلوب، سون ايكي ايلده ايسه ايرانين اوْن ايالته بؤلونمه لاييحه‌سي همين ضرورتي داها دا ووُرغولاماقدادير.

3 – وطنداشلارين كولتورل، ايقتيصادي و سياسي حاقلاريني آچيقلاييب، قانون چرچيوه‌سينه سالماق، بوتون ساحه‌لرده اوْنلارين برابرليگيني ساغلاماق جومهوريتين ساغلامليغي و مؤحكملنمه‌سينه تأمينات وئرير. اوْنون اوچون هرهانسي دوشونجه، فيكير، سوْي، مذهبه باغليليق اوستونلوک و مشروعيت قايناغي ساييلماز. بيزه گؤره مشروعيّتين تك بير قايناغي آزاد و دموكراتيك سئچكيلرده قازانيلان اكثريّتين سسيدير.

4 – ايران چوْخ ميلّتلي بير اؤلكه اوْلدوغونا گؤره، تاريخ بوْيو اوْنون گئنيش اراضيلر‌ينده چوْخ دانيشيلان و موستقيل توركجه، فارسجا، عربجه، كوردجه، توركمنجه و بلوچجا كيمي ديللر ياييلميشدير. بوُ سببدن آنا ديلده تعليم و تربيه اوصولونون بوتون تحصيل ايللرينده تئزليكجه و شفّاف صورتده ايجرا اوْلماسي واجيبدير.

۵ – بوتون ديللر ، لهجه‌لر و كولتورل ايرثلريميز ايرانين بؤيوك معنوي ثروتي ساييلماسينا گؤره هئچ بير آيري سئچكيليك ائتمه‌دن، بوتون بوُ ديللر و لهجه‌لرين قوْرونوب، گليشديريلمه‌سينه و آتالاردان قالان ياديگارلارين ساخلانيلماسينا ال‌وئريشلي شراييط ياراتماق بيزيم ايستكلريميزدندير.

6 – توْپلومدا وطنداشلارين ياريسيني اوْلوشدوران قادينلارين اينساني مؤوقعي‌نين قوْرونماسي اوچون قادين حاقلاريندا آيري سئچكيليكلرين لغو ائديلمه‌سي بيان‌نامه‌سينه و اوْنون ضميمه‌لرينه روعايت واجيب شرطلردندير.

7 –  دموكراسيني قوْرويوب، دوام ائتديرمك اوچون اؤلكه‌نين هر يئرينده علمي ، كولتورل، ايقتيصادي و ايجتيماعي ساحه‌لرده دواملي گليشديرمه ايشلري لازيمدير. بيز امنيّت، تعليم و تربيه، عومومي يايين اوْرقانلاري، ساغليق، ايش، ائو و ساييره ايمكانلاردان برابر شكيلده فايدالانما حاقّيني هامي اوچون طلب ائديريك.

8 – ايرانين ياشاييش موحيطي، ياشام طرزلري و ژنتيك خزينه‌سي ميلّي ثروتلريميزين ان اؤنمليسيدير. بيز سوْن ايللرده ياشاييش موحطينه ووُرولان زيانلارين اوْرتادان قالديريلماسي و دَيرلي ميلّي ثروتلريميزين قوْرونماسيني ايسته‌ييريك.

9 – بيزجه ميلّي منفعتلري قوْروماق شرطي ايله، اوُلوسلار آراسي هارمونيك موناسيبتلرين تنظيملنمه‌سي، ميلّتلر آراسي دوْستلوغون گوجلنمه‌سي، هابئله دونيادا صولح و امن- امانليغين قوْرونماسي ميلّي گليشمه‌‌نين و امنيّتين اؤن شرطيدير.

بيز بوتون ايستكلريميزي دينج يوْللارلا ساغلاماغي دوشونوروك. بيزجه بوتون دينج چاليشمالار، او جومله‌دن تحصّون، ييغينجاق، ميتينگ، اعتيصاب و رفراندوما چاغيريش ميلّتيميزين اؤز حاقلارينا چاتماسيندا ان طبيعي حاقلار كيمي دَيَرلنديريلمه‌ليدير.
بيز اينانيريق كي، يوُخاريدا قئيد اوْلونانلاري اؤرت- باسدير ائتمک، ياخوددا اوْنلارا سايغيسيزليق خالقين بير چوْخ قيسمي‌نين اينام و گوونجيني ايتيرمگه گتيريب چيخاراجاق و اوْلا بيلسين كي، قارشي‌دوُرمالارا يوْل آچسين و گوجلرين هدره گئتمه‌سينه و گليشمه‌ميزين انگللنمه‌سينه سبب اولسون.
اوميد ائديريك کي، توْپلومون گليشمه‌سي اوچون تمناسيز چاليشانلار اؤلكه‌نين اؤزلليكلري، چاتيشماز جهتلري و منطقه‌ده‌كي دَييشيكليكلري دوزگون شکيلده آراشديريب، تحليل ائده‌رك، ايران خالقي‌نين حركتينده يوُخاريدا قئيد ائديلن هدفلره يوْل آچسينلار.
اوْلسون كي، اؤز ايجتيماعي حركت و نهضتلريميزده دموكراسيدن و جمعيتيميزين چتينليكلريندن آچيق بير گؤرونوش اوْرتايا قوْياراق، آزاد و برابرحوقوق وطنداشلاري اوْلان بير باشي‌اوُجا و ايرليله‌ميش اؤلكه‌نين تمليني قوْيماغا ناييل اوْلاق.

۱۳۸۲ اینجی گونش ایلی – تیر آینین ۷

» آذربایجان دانیشیر » ین تورکجه ، فارسجا و اینگیلیسجه سی

6 مارس 2010 Posted by | تورکجه - Turkce, سند لر- اسناد | , , , | 2 دیدگاه

   

%d وب‌نوشت‌نویس این را دوست دارند: